SIMBA, MBEYA CITY LAO MOJA

WIKIENDI iliyopita katika Uwanja wa Sokoine jijini hapa kulikuwepo na mechi mbili za Ligi Kuu Bara kati ya Simba na Prisons iliyochezwa Jumamosi, Mbeya City na Mtibwa Sugar iliyochezwa juzi Jumapili.

Mechi zote mbili zilikuwa na mashabiki wa kutosha huku Simba ikijaza zaidi mashabiki wake kutoka Dar es Salaam wakati Mbeya City ikiwa na mashabiki wake wazawa, uwingi wa mashabiki hao ulikuwa na lengo moja tu kuzisapoti timu zao ili zipate ushindi.

Katika mchezo wa Simba na Prisons matokeo yalikuwa ni sare ya bao 1-1, bao la Simba likifungwa na Emmanuel Okwi wakati Prisons walisawazisha kupitia mshambuliaji wao Hamis Maingo katika dakika za lala salama.

Kwa matokeo hayo Simba iliambulia pointi moja na kufikisha pointi tano katika michezomitano walizocheza dhidi ya Coastal Union, Stand United, Polisi Moro na Yanga ambazo zote walitoka sare.

Kwa sasa Simba inajiandaa na mechi yake nyingine ambayo pia watakuwa ugenini kwenye Uwanja wa Jamhuri mkoani Morogoro ambapo watacheza na Mtibwa Sugar wanaoongoza ligi wakiwa na pointi 13 wakati Simba wanashika nafasi ya 10.

Mbeya City inashika nafasi ya 11 ikiwa na pointi tano sawa na Simba ingawa wametofautiana kwa mabao ya kufunga na kufungwa wakati Prisons ina pointi tano na inashika nafasi ya tisa.

Mbeya City inaondoka kesho Jumatano kuelekea Shinyanga ambako itacheza mechi yake dhidi ya Stand United na baada ya hapo itasafiri mpaka Bukoba kucheza na Kagera Sugar.

Katika mechi zilichezwa jijini Mbeya baadhi ya mambo yalionekana kuchangia kupata matokeo mabaya kwa timu hizo mbili za Simba na Mbeya City ambayo Mwanaspoti imeyafanyia uchunguzi.

Dakika 45 za Simba kipindi cha pili

Kwa upande wa Simba, Kocha Mkuu Patrick Phiri alifanya mabadiiko kipindi cha pili kwa kuimtoa Said Ndemla na kumwingiza Amri Kiemba, alitolewa Ramadhani Singano akaingia Haroun Chanongo. Lakini kipindi cha kwanza timu hiyo ilicheza vizuri na kupata bao la mapema.

Baada ya mabadiliko hayo, Simba ilipwaya katikati na kupokea mashambulizi mengi kutoka kwa Prisons ambao walisawazisha katika dakika za lala salama huku wachezaji wa Simba wakionekana kuishiwa pumzi na kutokuwa na kasi ya kukimbia na kuwakaba wapinzani wao. Phiri alikiri kuwa mabadiliko aliyoyafanya yaliigharimu timu yao.